GIDAMGO KO ANG BATHALA

             Ni Vic Odarve

 

Gihulma ko ang imong larawan

Nga ako nikatkat ngadto sa kalangitan

Uban sa mga bitoon ug mga kalibutan

Nga misud-ong sa imong kabulahanan.

 

Gipintal ko ang imong hitsura

Ang imong kaanyag wa gyoy sama

Nga nahisulat na sa akong pangisip

Milambo daw nga way makahulip.

 

Diha naaninaw ko ang imong dughan

Sa damgo mao nay tomoy sa katumanan

Kang Adonis iya siyang giampoan

Ug gisangyaw pa sa ubang kanasuran.

 

Ikaw gyod ang natawong prinsisa

Nagpukaw sa dughan kong nag-usisa

Uban ang swerte kong kapalaran

Nga ikaw gyod ang akong nakit-an.

 

Gusto ko nang ikaw isangyaw

Aron dili ka madaling mahanaw

Kay gililok ko ikaw akong bathala

Nga permi gyod sa akong hunahuna.

 

Apan sa diha nang ikaw nakita

Maoy katumanan sa mga propeta

Gikan sa pobre kong panghunahuna

Sa damgo lang diay ikaw namugna.

 

 

 

 

ANG SAPA SA BOGAC

       Ni Flordelina

 

Bisan asa ako molingi,

Walay usang talan-awon ang makahulip,

Sa akong gibating kahingawa,

Sa matag maagian kong gipunting sa akong mga mata.

Duna akoy gipangita, duna akoy buot masuta'

Kung may mga lama' pa ba sa kagahapon,

Apan pakyas ako, kay giusab man sa panahon.

 

Dako akong kahingawa,

Sa sapa sa Bogac ako natingala,

Gipangita ko ang kanhing hinaganas sa tubig,

Nagpanawag sa mga bata malingaw

Mag timpasaw sa bugnawng sapa

Mihoot akong dughan kay nakita ko dili na sapa

Daw kanal na lang kini nga way pagkahupa'

(Lorna 2016 ASC class reunion)

 

 

 

ANG TALIDHAY SA LAMPINGASAN!

        Ni Flordelina

 

Ug nabati ko talidhay nga daw gigitik,

Katawang walay tihik-tihik,

Abi'g walay nagpakabana'

Sa binuhatan sa banyaga'.

Hataas ug makutas 

Ang gisubay ko'g gitadlas,

Pagpaubos nga walay sama,

Apan daw diamante'g kinaiya,

Padayong nangaliyupo,

Dughang nagsubo'.

Kapid-an ka higayon 

Ako na untang hunosan,

Kinabuhing way kalipay,

Walay kapuslanan,

Apan hugasan man sa luha 

Mga lama' sa kagahapon,

Lad-okon ko na lang,

sa kamatayon balonon.