tinagik ni Vic Odarve
 |
| Mayana Village Sunset |
Nakita na ang unang bidlisiw sa adlaw
Ning kinabuhi daw usa ka lulinghayaw
Nga niabot na sa pungtod sa kapanahunan
Karon ania na paduol na sa katapusan.
Sa pagsugod pa sa sayong kabuntagon
Nga nagkamang sa inahan pagakargahon
Adto sa umahan ug unang edukasyon
Ang palibot malipayong handomon
 |
| Panahon sa kabatan-on |
Ginasulat na ang hitabo sa kaudtohon
Didto sa panahon sa pagkabatan-on
Nagsugod ang gugmang pagabation
Kay ulitawo na ang atong panuigon.
Karon ang panahon na sa kahaponon
Mius-os na ang katahom ug mga pahiyom
Kunot sa nawong ug sa isip makalimoton
Kay tigulang na gyod bisan ug unsaon.
 |
| Kahaponon sa kinabuhi |
Makita nga migamay na sab imong higala
Ang uban barkada naa pa; ang uban nipanaw na
Mao na gyod na ang badlis sa atong kinabuhi
Ang tanang tawo moagi ug dili makadumili.
Gusto unta balikon ang mga kagahapon
Matam-is ug masakit man nga handomon
Kay sila kabahin na sa atong kinabuhi
Nga kanunay makigdula sa atong pagbati.
 |
| Amahan sa Langit |
Karon hinay na ang kahayag ug puli na ang kangitgit
Kay moadto na sa amahan naglingkod sa langit
Ginasulat na sa mga propeta ug mga patriarka
Tanan may kahaponon ug di na matingala pa.
No comments:
Post a Comment