ni Vic Odarve
 |
| Ulahi ang Pagmahay |
Sa panahon sa imong kabatan-on
Ang ginikanan naningkamot intawon
Pangayupo ug pag-ampo sangko sa langit
Nga unta sa mga dautan di ka malambigit.
Ilang giantos ang ilang kaugalingon
Napakalisod sa ilang mga panahon
Nga sa damlag ikaw anak malamposon
Makatabang ka sa imong kaugmaon.
Sa dihang ikaw gyod masinupakon
Sa gusto nila nga dapat sundon
Para unta sa imong kaugmaon
Mitalibagbag man ka bisan unsaon.
Karon naglisod na ang panahon
Wa man kay natapos nga edukasyon
Nagkalandrakas ang imong kaugalingon
Wa gyoy nadangpan bisan igsoon.
Nipanaw na man imong ginikanan
Sa hingpit ila na kang gibiyaan
Ug karon wala na kay kaadtuan
Bisan sa suod mong kahigalaan.
Kon sangko sa langit imong pagmahay
Kay ang imong kinabuhi nagkagidlay
Nagmahay ug nagminghoy sa kataposan
Kay napandol man ka sa sakdong dalan.
No comments:
Post a Comment