Gibasolan Ko Na Ang Tanan

       ni Vic Odarve

 

         

Gipaeskwela ko ug maayo sa akong ginikanan

Pero mitalibagbag man ang akong gipadulngan

Kay sa libro ug notebook ko unta mahigugma

Didto man hinoon nakig-uban sa mga barkada.

 

Ulahi na nasayran sa akong ginikanan

Nga sa droga ug sa inuman naglaklakan

Nagpaoraray diha sa mga kaliwat ni Eva

Didto nahurot ang ilang gipadalang kwarta.

 

Barkada sa inuman

 

 

 

 

 

 

 

 

 

 

 

 O Ginoo, naunsa man ang akong gidangatan

Ako ang kaaway numero uno sa akong ginikanan

Bisan sa akong pangayo og libolibong pasaylo

Sa kanila wa na gyod bili akong pagkatawo.

 

Sa kanila nako usab nasayran ang tanan

Nga nabaligya diay ang among kayutaan

Sa pag-eskwela ako ilang giantosan

Para ra gyod ko mahuman ug gradohan.

 

Sa kabasakan

 

 

 

 

 

 

 

 

 

 

 

Gimahayan ko na kining tanan kong binuhatan

Sangko sa langit ug sa tibook kong dughan

Luha ug dangoyngoy sa akong pagbangutan

Kon madumduman ko ang akong giagoman.

 

Sa mitaliwan kong mahal nga papa ug mama

Gibiyaan ako nga wa man atubanga ug pasayloa

Sa langit inyong nakita ang akong kalibotan

Wala koy grado ug gibasolan ko na ang tanan.