ni Vic Odarve
Sa banagbanag sa kaadlawon
Ikaw mitabon sa akong katulugon
Napintal sa akong paghanduraw
Daw nahimugso ug dili mahanaw.
Unya nigawas ang imong pahiyom
Dayon natawo sa akong paghandom
Pagkanindot gyod pagasud-ungon
Ang imong katahom nga bililhon.
Bisan ang mga bulan ug mga bitoon
Misayaw ug mitimbaya nga magarbohon
Gani ang kalanggaman ug kabulakan
Nanag awit ngadto sa tibook kalibotan.
Ikaw na gyod ang usa ka talagsaong diyosa
Ginag- ampoan ug ginaludhan sa mga propeta
Bisan man gani ang ubos mong higala
Nahigmata ug nakakat-on sa paghigugma.
Dili ko gyod unta ka akong kalimtan
Kay mando na man kini sa kapalaran
Nasapnan ko na ang tinood nga gugma
Nga nagtago sa duha ko nga mga mata.
Sugod na unta pagdako ang Paraiso
Nga sa kasingkasing gyod natawo
Apan kawang lang ang paglambo
Kay diha ra diay sa usa ka damgo.
At You Tube:
Thanks for watching.
No comments:
Post a Comment