NAKITA KO NA ANG GOLD BARS

           ni  Vic Odarve

“Tinuod gyod diay ning gold bars” nakaingon ko sa akong kaugalingon samtang nagbasa sa tatak UNION BANK OF BURMA, 7.5 KGS AU  nga nakapatik diha sa ibabaw nga bahin sa bar.

Dili gyod ko motuo aning gold bars sa una kay nabasa ra man ni nako nga daghan ug gold bars nga gitagoan ni Presidente Marcos. Pero sa nibisita si Nong Donato nga gikan sa El Papa bukid sa Davao Oriental ug mituyo gyod sa ako nga dunay  gold bars baligya P110,000.00 kada bareta, daw dili ko katoo. Ug isip pagsiguro ug tinuod ba gyod ni o basin fake, ako siyang giingnan nga magdala sya ug sample gikan ana nga bars sa sunod bisita niya.

Gold Bars

Tuod man human sa usa ka bulan, nibalik sya ug may dala nga sample nga pino gikan sa maong bar nga sya mismo ang nagkuskos sa kilid sa bar. Dayon gipatesting ko sa laboratory sa kompanya nga ako gitrabahoan ug ang katunga  gidala ko sa higalang goldsmith. Tuod man tinuod gyod nga 22K ang result!

Sa hilom uban ang kauban ko sa trabaho nagtipon tipon mi ug kwarta nga P55 T kay tunga o putol ra ang among paliton. Gituyo nako nga tunga lang kay magdala ko ug chemical gikan sa laboratory ug ipatulo nako sa putol nga gold bars para klaro nga gold ba ang pinutlan o sulod ninii kay basin fake diay. Kon gold gyod, adto ra pod ang bayad sa balay sa ako ig agaw diin nakatood man ang nagbaligya para sab safety nga way dala kwarta ngadto sa usa ka lumad o native nga nagkubot sa gold bars.

Paingon sa Bukid

Sa tambag sab ni Nong Donato, dili magdala ug celpon ug kwarta ug mga mahalon nga butang kay bukid ang adtoan ug magmotor ra mi tulo uban ang driver. Ug nagbakos pa mi ug anting-anting nga garapa nga ang sulod haplas nga mobukaw kon may dautang tawo nga mahimamat sa dalan. Gikan sa Trento ug El Papa miabot mi sa maong lugar nga boundary na sa Bukidnon ug Davao Oriental human sa 6 ka oras biyahe.

Tuod man pag-abot sa bukid, naglakad pa mi ug 300 meters gikan sa dalan ug diha gyod nakita ang gold bars dala sa usa ka lumad o native duol sa iya payag. Mga tunga oras namong gihuptan  ang maong gold bars ug nakita ko ang gikulit nga tatak “UNION BANK OF BURMA AU 7.5 kgs”. Parang usa ka loaf bread ang porma ug brownish ang ibabaw nga color.

Among gihangyo nga katunga ra ang paliton kay kulang kwarta ug ang bayad didto lang sa balay sa ako ig-agaw. Gituyo pod ni namo kay pahiran pod sa kemikal ang gigabsan para makita ba tinuod o fake.

Marcos Gold Bars

Bisan unsaon ug hangyo, wala gyod sya musogot kon putlon o tunga ra ang paliton. Kay kulang pod amo kwarta ug duda pod basin ang ilawom dili gold, miuli na lang mi nga way nadala.

Paglabay sa usa ka bulan, nabalitaan namo nga nahalin na ang gold bars. Ang usa napalit sa driver sa habalhabal sa isda ug ang uban napalit na sab sa usa ka pari nga naassign sa maong lugar.

Karon kon madungog na pod ang pangalan ni Bongbong Marcos, ako dayon madumduman ang gold bars nga gitagoan sa iyang amahan ug ang akong nakitang gold bars. Ug basin kauban ra na sila sa Yamashita treasures nga gibiyaan sa mga Hapones sa hapit na nahuman ang World War ll.

Nakita na gyod nako ang gold bars!